Servus Schwoweweiwer un -männer!
Im Banat hot zu jeder schwowisch Tanzkapell e Akkordeon gheert. Aus'm rumänische Taraf is des Instrument sowieso net wegzudenke. Vun unser schwowische Landsleit hot's e paar gewewe, die ware wirkliche Meistre uf em Akkordeon. Im Amateurbereich war de Johrmarker Kapellemaaster
Hans Kaszner sen. e echter Tausendsassa und vun de Profimusiker war de
Hans Fritz vun der Temeswarer Philharmonie - dort hot er Bassgei gspillt - e absolute Akkordeonkinstler.
Es Akkordeon, wie mer's im Banat gekennt hun, is jo e Tasten-Zuginstrument. No gebts awwer aah die sogenannte Knopf-Zuginstrumente. Uf manche Därfer hot merr frieher in Banat aah Knopfharmonikas gspillt. In Johrmark soll de
Jungche Martin (
Kassnel) e guter Knopfharmonikaspiller gewen sein. Er hot frieher im
Kreider (
Kräuter) seiner Schrammelkapell gspillt.
Mittlerweil hun die Akkordeons de Wech aah in die klassisch Musik funn. De Argentinier
Astor Piazzolla (1921 - 1992) is mit seim Pandoneon, des is so e Art Knopfharmonika, beriehmt wor, obzwar des Instrument eigentlich vu'me deitsche Instrumentebauer erfunn is wor. De
Piazzolla hot awwer net norr gspillt, der hot aah vill komponeert forr des Instrument.
Die vorich Wuch, am 26. Fewer 2009, hot in Ingolstadt e junger Musiker so e Piazzolla-Konzert forr Pandoneon gspillt. Er hot awwer ka Pandoneon ghat, sondern hot uf'me Bajan gspillt. Des is e russisches Akkordeon mit Knepp statt Klappe, awwer im Tonumfang fast so mächtich wie e Orgel. In dem
Concerto Aconcagua hot's wunnerscheene Tangomelodiee gewwe, wie halt in Argentinien. Was der
Aydar Gaynullin gspillt hot uf seim Bajan, war schlicht un einfach göttlich.
Göttlich im wahrsten Sinne des Wortes, wie merr so scheen sat, war aah des Stick
Sieben Worte für Bajan, Violloncello und Streichorchester vun
Sofia Gubaidulina (*1931). Do gehts nämlich um die letzte siwe Sätz vum Jesus am Kreiz. Die aah noch sehr jungi Violoncellistin
Tatjana Vassilieva hot's Cello mit vill Inbrunst gspillt. Asso merr sellt schun ausgeruht in so e Konzert gehn, dass merr net vor lauder Scheenheit inschloft.
Begleit wor sin die zwaa vum Georgische Kammerorchester Ingolstadt. Die Georgier, wie se in Ingolstadt genennt werre, hun aah noch die
Trauersinfonie vum
Joseph Haydn (1732 - 1809) gspillt. Die hot der gut Mann uf'm Gut vum Fürst Esterházy forr sei eigne Sterwetach gschrieb. Awwer er war damals (1772) einfach noch zu jung forr so e toternsti Gschicht. Ich hun wirklich nicks Trauriches gheert. Was die Georgier unner ehrem Dirigent
Ariel Zuckermann do gspillt hun, war norr scheen, sehr scheen.
Adje, saat Eich de Potche Toni
Abonnenten: 0
Lesezeichen: 0
Zugriffe: 1590
